Jer 36 | MEU | STEP | Iehoiakim, Iuda pavapavana Iosia natuna ena lohia laḡanina ihahanina ai, ina hereva Iehova ena amo na Ieremia enai e kau, eto:

Jeremiah 36

King Iehoiakim ese peroveta pepana e doua

1 Iehoiakim, Iuda pavapavana Iosia natuna ena lohia laḡanina ihahanina ai, ina hereva Iehova ena amo na Ieremia enai e kau, eto: 2 Pepa ta avabia, Israel bona Iuda bona bese idau-idau iboudiai ihadikadia herevadia, vada na gwaurai henimu ḡaudia, na hereva henimu matama dinana amo, Iosia ena nega ai, ema bona ina dina, vada ba tore. 3 Readia Iuda iduhuna taudia na ihadikadia karadia iboudiai vada na lalo hata baina kara henidia nato herevadia bae kamonai, bena una dainai iboudiai ese edia dala dikadia bae rakatani, bena lau ese edia kara havara bona edia kara dika baina gwau tao.

4 Bena Ieremia ese Baruku Neria e boiria; bona Iehova ese vada e hamaorolaia herevadia iboudiai na Ieremia ese e gwaurai, bena Baruku ese pepa ta ai e tore. 5 Bena Ieremia ese Baruku e haduaia, eto, Vada e g vaugu tao, Iehova ena dubu ilao-henina ai; 6 una dainai oi hari baola, bena anivaga dinana ta ai Iehova ena hereva, lau ese vada na gwaurai bona oi ese pepa ai vada o tore ḡaudia, na Iehova ena dubu ai e heboumu taudia iboudiai vairadiai ba duahi. Iuda taudia, edia hanua amo vada e raka lasi taudia iboudiai, vairadiai danu ba duahi. 7 Readia edia noinoi na Iehova enai baine kau, bena iboudiai ese edia dala dikadia bae rakatanidia, badina be badu bona lalo-siahu Iehova ese ina bese latanai vada e gwaurai na bada herea. 8 Bena Baruku Neria ese peroveta tauna Ieremia ena hahedua idoinai heḡereḡerena ai e karaia, Iehova ena hereva na pepa amo e duahia, Iehova ena dubu ai.

9 Iehoiakim, Iuda pavapavana Iosia natuna, ena lohia laḡanina iha-imana huana ihataurahani-tana ai, Ierusalem taudia iboudiai bona Iuda hanuadia amo Ierusalem vada ema taudia iboudiai ese anivaga e gwauraia Iehova vairanai. 10 Bena taunimanima iboudiai vairadiai Baruku ese Ieremia ena hereva na pepa amo e duahia, Iehova ena dubu ai, toretore tauna Gemaria Safana ena daiutu lalonai. Una daiutu na alai maguna ai, Iehova ena dubu ikoukouna, ladana Ikoukou Matamatana, badibadinai.

11 Mikaia Gemaria Safana natuna, ese Iehova ena hereva iboudiai, pepa amo e duahi ḡaudia, na e kamonai negana ai, 12 ia na pavapava ena ruma e diho lao, toretore tauna ena daiutu ai e raka vareai. Lohia iboudiai unuseni ai e helaiva: toretore tauna Elisama, Semaia natuna Delaia, Akaboro natuna Elnatan, Safana natuna Gemaria, Hanania natuna Sedekia, bona lohia iboudiai. 13 Bena Mikaia ese e kamonai herevadia iboudiai, Baruku ese taunimanima vairadiai pepa amo e duahi herevadia, na e hamaorolaidia. 14 Bena lohia iboudiai ese lehudi (ia na Netania natuna, Netania na Selemia natuna, Selemia na Kusi natuna) e siaia lao, Baruku baine hamaoroa, baineto, Hari taunimanima vairadiai o duahia pepana na imamu ai bavabia, vada baoma. Taunabunai, Baruku Neria ese pepa na imana ai e abia, bena dekedia ela. 15 Idia ese e hamaoroa, eto, A helai diho, ba duahia. Taunabunai, Baruku ese e duahi henidia. 16 Unu hereva iboudiai e kamonai negana ai, idia na mai garidia ida e heroha heheni. Bena idia ese Baruku e hamaoroa, eto, Ini-hereva iboudiai na hanua pavapavana do baia hamaorolaia. 17 Bena idia ese Baruku e nanadaia, eto, A hamaoromai, ini hereva iboudiai ede o tore toma? Ia ese e gwaurai bena o tore a? 18 Bena Baruku ese e haere henidia, eto, Ia ese ini hereva iboudiai e gwaurai henigu, bena lau ese ink amo na tore, pepa ai. 19 Bena hari lohia ese Baruku e hamaoroa, eto, Aola, a komu, oi bona Ieremia danu, bona tau ta basine diba umui na edeseni ai.

20 Taunabunai, idia ese pepa na toretore tauna Elisama ena daiutu ai e atoa, bena hanua pavapavana ena maḡu lalonai e raka vareai, unu hereva iboudiai na hanua pavapavana e hamaorolaia. 21 Bena hanua pavapavana ese Iehudi na pepa iabina totona e siaia lao; bena ia ese toretore tauna Elisama ena daiutu lalona amo.e abia. Bena Iehudi ese hanua parapavana bona hanua pavapavana badibadinai e giniva lohiadia e duahi henidia. 22 Nega na hua ihataurahani-tana; hanua pavapavana na keru negana rumana ai e helaiva, bona lahi na rahurahu ai vada e ha-araia ia vairanai. 23 Iehudi ese ere toi eiava hani e duahidia, bena hanua pavapavana ese kaia maragina amo e utudia oho, hari rahurahu ai e arava lahina lalonai e tahodia vareai. Unu mo e kara toma ela bona pepa Idoinai na una rahurahu ai e arava lahina ai e ara ore. 24 Ḡau tamona, ini hereva iboudiai e kamonai vaitani murinai, hanua pavapavana eiava ena hesiai taudia ta se gari, eiava edia dabua asie dare. 25 Ena be Elnatan bona Delaia bona Gemaria ese hanua pavapavana e hereva henia goadagoada, pepa na basine doua, to ia ese se kamonai henidia. 26 Bena hanua pavapavana ese Ierahamele, hanua pavapavana natuna, bona Seraia, Asriel natuna, bona Selemia, Abdele natuna, na e haḡanidia, idia ese toretore tauna Baruku bona peroveta tauna leremia bae dabaidia tao. A Iehova ese e hunidia.

27 Ieremia ese e gwaurai bena Baruku ese e tore herevadia pepana na hanua pavapavana ese e doua murinai, Iehova ena hereva ta Ieremia enai e kau, eto, 28 Ma pepa ta bavabia, hereva gunadia, pepa gini-gunana, Iehoiakim, Iuda pavapavana, ese e doua ḡauna, ai e tore herevadia ma ba tore lou. 29 Bona Iehoiakim, Iuda pavapavana, na ini ba herevalaia toma, baoto, Iehova ini e gwau tomamu: Ina pepa vada o doua, oto “Dahaka dainai ia lalonai vada o torea Babulono pavapavana na momokani bainema, ina tano baine habuaia tari bona taunimanima bona ubu-ubu ḡaudia na ia lalona amo baine negedia daure?” 30 Taunabunai, Iehova ese Iehoiakim, Iuda pavapavana, na ini e herevalaia tomamu: Ia garana ta ese David ena terono ai basine helai kau; bona ia tau-anina masena na murimuri ai bae negea lasi, dina garaḡarana ai bona hanuaboi parakana ai baine mia. 31 Lau ese ia bona natuna bona ena hesiai taudia na davadia baina henidia, edia kara havara daidiai. Idia latadiai, bona Ierusalem inoholaina taudia bona Iuda taudia latadiai, dika idoinai, idia latadiai vada na gwauraia ḡauna, na baina hadihoa; a idia na asie ura bae kamonai.

32 Bena Ieremia ese pepa ta ma e abia, itorena tauna Baruku Neria e henia; bena Iehoiakim, Iuda pavapavana, ese lahi ai e doua pepana herevadia iboudiai na Ieremia ese ma e gwaurai bona Baruku ese ma e tore; bona hereva unuhetomadia momo na idia latadiai ma e tore kau.